و لسه بنرقص على السلم

أهنئ الشعب اللبناني بالنصر بالرغم من أنه مازال يوجد بعض القوات الاسرائيليه بالأراضي اللبنانية و لكن لا يمكن أن ننكر انتصار لبنان و المقاومة اللبنانية وهذا يتضح أيضا من التضاءل الكبير لشعبية أولمرت في إسرائيل منذ بداية الحرب على لبنان نتيجة للخسائر الكثيرة التي تعرضت لها إسرائيل و التي لم تكن ضمن تقديراتهم فهذا الشعب اللبناني الذي يمرح و يفرح و يرقص و يغني و يحاول التمتع بكل لحظات حياته هو نفس الشعب الذي يضحي بكل حياته من أجل وطنه ,الشعب الذي لم يتردد في أن يجيب نداء الوطن و لم يحدث أبدا أن خذل هذا الشعب وطنه
ف حقيقة إن هذا الشعب الذي هو الوحيد الذي حافظ على كرامته فهو الشعب الذي لم يتخذ الذل حليفا له كما فعلنا نحن بقية العرب و لم يتخلى عن كرامته بالرغم كل الصعوبات التي تحدته فهو الشعب الذي يقدس الفرحة و المقاومة الشعب الذي لم يرقص على السلم كما فعلنا نحن المصريين و أصبحنا لاطايلين لا سما ولا أرض
تحية لك يا لبنان

لما اعترض على اللي ما يعجبنيش
تسعد كافي بحمل مسئوليتي
و أحس إني بعيش
و أنا بعترض

***
أنا بعترض على الباطل المطلوق سراحه
و الحق متكتف بجنزير حديد
و باعترض على قلة البركه
في كل ايد
و بعترض على قسمة المخاليق
حراس و سادة و عبيد

***
أنا بعترض ع الهوا
لما يكون مقصور على الشرفات
و باعترض على الميه
اللي مترضاش تمشي ف العالي
و باعترض على الشمس
لما توزع ضؤها من غير عدل
و تطل على القصر
و تهمل الأكواخ

***
أنا بعترض على ندوة المحاسيب
لما يكون الرأي خدام مصالح
و باعترض على خمسميت ألف طالح
بيعربدوا و يخربوا ف البنا
و أعترض على الغنا
لما يكون إعلان ف الانتخابات

***
أنا بعترض ع الزحام
الماشي من غير كلام
غرقان في بحر السكات

***
و باعترض على ندرة الأصوات
رغم الزيادة كل يوم ف العدد
أنا بعترض ع الألم
اللي انكتم ف الضمير
و على الوجوه الخالية م التعبير

***
و باعترض ع الحرج
اللي العجائز بتعانيه
لما العيال تسأل سؤال واضح
مالهوش جواب عندهم

***
و باعترض و باعترض
على ملايين الحاجات
أشياء كتير لو قلتها
البحر مايكفيش مداد

***
لكن اعتراضي الأهم
ينصب قبل كل شيء
على العيون الكارهة للحرية
اللي بتنظر لي بغضب و عداء
و أنا بعترض

**********

للشاعر

فؤاد قاعود

(القصيدة بلا عنوان وهى اعتزار لبيروت التي أهيم في هواها)

من السكوت والذل

الأرض بتقول آه
والناس بتغلي وصوتهم
السما سمعاه
سلطان ومتسلطن
من فوق رقاب الناس
لا عمره يعرف شرف
ولا الكرامة أساس
والشهدا صار دمهم
من الكلاب ينداس
بيروت يا نني العين
بيروت يا نني العين
مش قادر احميكي
ولا قادر أوفي بعهد
وحدك ومتحاصرة
واحنا واخدنا البعد
بتواجهى طغيانهم
وما في جنبك حد
فرسانا باعوا السيوف
وهم البطولة اتهد
فرسانك أنتي الأمل
عارفين غرامك فرض
يا أحلى حورية
الحزن فاق الحد
والعار مغطينا
والصيف شديد البرد
علي زغاريدك
للشهدا والأسرى
الدم لون الورد

ومعندناش حسرة

التضحية معنى
مش كلمة وغطاها
التضحية سكة
ارواحنا فرشاها
حزب الله
الله معك
وادينا تانى دروس
بتواجه الجبنا
والسافل اللي يبوس
ايد العدو
عندي
منه أنا محبوس

: كتب القصيدة

(عبدالعزيزعبدالله (مصري ناصري

أعمل ايه

اترددت كتير أوي قبل ماكتب المرة دي مع إن الموضوع ده مهم عندي جدا بس مكنتش عارفه أتكلم فيه مع حد ولا لأ المهم قلت إني عامله مدونه عشان اكتب فيها أي حاجه أنا عايزاها أيا كانت سياسة ,دين
أو موضوع اجتماعي أو حتى حاجه شخصيه و ده موضوع شخصي و يمكن ميهمكوش ف حاجه
لو قرأتوه أو لأ و يمكن كمان تفتكروه موضوع عبيط و إني واحده فاضيه مش لاقيه حاجه …تكتب فيها بس هو مهم عندي و أنا محتاجة أعرف رأي ناس كتير فيه
بالرغم من إني ممكن أتكلم ف السياسة و أنا مش خايفه ببقى حسه إني مش بعمل اللي المفروض أعمله عشان مصر ببقى حسه إني مش بدافع عن بلدي زي ما في ناس كتير بتعمل عشانها و مش بيهمها حاجه غير مصر يعني أنا مش بنزل مظاهرات ولا اعتصامات غير قليل أوي و ده مش عشان أنا عايزه كده ولا عشان خايفه من البلطجيه بتوع الأمن لأ ده أنا ببقى نفسي أنزل كل مظاهره و أبقى أول واحده توصل و مش أفوت حاجه منها و المرات القليلة اللي بنزل فيها مظاهرات ببقى بجد نفسي أفضل موجودة مع المتظاهرين و متخلصش المظاهرة ساعتها بحس أوي إني ف بلدي و بين المصريين بجد و إني بحب مصر أوي و مش ببقى خايفه خالص
بس المشكلة بقى اللي مخلياني حاسة إني مش بعمل اللي المفروض أعمله عشان مصر و مش بنزل المظاهرات هي أمي بتبقى خايفه أوي إن يجرالي حاجه لو نزلت خايفه لأتاخد مثلا ف أمن الدولة و أنا كلمتها كتير أووي في الموضوع ده و قلتلها إني خلاص اخترت الطريق ده ولازم أستحمله بحلوه و مره بس مفيش فايده و رافضه إني أنزل و كمان أني أكتب ف سياسة بس ده أنا مش هقدر أوقف ده لو حصل إيه و دايما أنا و هي ف مشاكل بسبب الموضوع ده و بتصعب عليا كتير و ناس كتير قالولي إني أنانية أوي و إني مش خايفه عليها بس أنا اخترت طريقة حياتي والمفروض يكون ليه الحق ده بس المشكلة كلها ف أمي و أنا دلوقتي محتارة بجد و مش عارفة أعمل إيه هل أصمم على اللي أنا عايزاه و اللي شايفاه صح و أفضل مكمله الطريق اللي اختارته ولا أبقى كده فعلا أنانية و ظلمت أمي؟؟؟
ملحوظة:أنا بجد مش بقدر أعمل حاجه أنا مش مقتنعة بها عشان كده مش قادرة أوافق على اللي أمي بتقولي عليه حقيقي محتاجة رأى ناس كتير

حراااااااااااااااااام

هنفضل قاعدين في بيوتنا واكلين,شاربين ,نايمين ,ساكتين على اللي بيحصل في لبنان و فلسطين, ساكتين على اللي بيموتوا كل يوم لحد امتى؟؟؟؟؟؟؟؟
هو ده الإسلام عندكم يا مسلمين, هي دي المسيحية يا مسيحيين, هي دي اليهودية يا يهود؟؟؟؟؟ مش المفروض برده إن عندكم في ديانتكم الدفاع عن الوطن فريضة,ولا لبنان مش وطن ولا انتوا بتختاروا الكلام اللي يريحكم و تنسوا اللي مش عجبكم؟؟؟؟ ولا هو الإسلام يا مسلمين إن انتوا تقفوا ضد الدانمارك و تقوم كل الدول الاسلاميه تنادي بمقاطعة الدانمارك و تقوم مظاهرات و تطالبوا بقطع العلاقات عشان اساؤا لنبيكم محمد برسم صور كاريكاتريه له
لكن بيحصل في لبنان اللي اكتر من كده بكتير واللي يسيء لكل الناس مش رسول ولا دين و بس لأ ده بيقتلنا كلنا إن لبنان بتذبح كل يوم و الأطفال تصبح أشلاء و الشهداء بالميات و لكن نحن نعيش حياتنا و كأن لا يحدث شيء بذمتكوا يا ناس إيه الأولى ندافع عنه رسول ترسم له صور ولا شعوب أصبحت بلا منازل وأطفال تحت الأنقاض و أطفال تانيه مِن غير أهل؟؟؟؟؟؟؟
هنفضل لأمتي مش قادرين نعمل حاجه؟؟؟هنفضل نقول مش إحنا اللي هنغير الوضع المنيل ده لأمتى؟؟؟؟ولا أصلا مش هنفضل؟؟؟
تونس أعلنت الحداد ثلاثة أيام و نكست أعلامها, إنما مصر بقى عملت ولا حاجه؟؟؟؟؟
لازم نصحي يا مصريين لازم نفوق ولا نستنا لما ييجي الدور علينا عشان نفوق
لازم المظاهرات متسكتش لازم كلنا نتظاهر لازم نطالب بطرد علمهم من سماءنا لازم نطالب بطرد سفيرهم من بلادنا و لو وصلت إننا نضرب عن الحياة في مصر فلنفعل ,يضرب الموظفين عن الذهاب إلي المصالح الحكومية و يضرب العمال و المزارعين و الأطباء و القضاة تضامنا مع لبنان و فلسطين..حتى تقطع العلاقات مع الصهاينة و تنفذ مطالبنا,فلتتحرك مصر و المصريين و ليظهر سخطنا و مصريتنا و عروبتنا حتى تتحرك حكومتنا و السيد رئيس الجمهورية قبل أن تختفي هذه الجمهورية
فلتذهب اتفاقية كامب ديفيد إلي الجحيم إننا لا نريد التطبيع مع إسرائيل و لا نريد التحالف مع الشيطان الصهيوني الأميركي و لكننا نريد عروبتنا و الدفاع عن الأبرياء.....فأين مصر,أين مصر,أين مصر؟؟؟؟؟؟

الأختلاف

إننا نعيش في مجتمع لا يقبل الاختلاف أيا كان شكل هذا الاختلاف فمن يخرج عن العادات و التقاليد و الديانات المعتادة و من أيضا يختلف داخل الديانة الواحدة فهو شاذ و على خطأ و ننفر منه ولا نحاول أن نقترب منه أبدا.
فعندما نجد بيننا من هم لا يدينون بأي ديانة ولا يتبعون طائفة دينيه (الملحدين) أو من هم يدينون بديانات أخرى غير الديانات السماوية نبتعد عنهم و نجعلهم كفار و نختلف معهم في جميع آرائهم حتى الصحيح منها و يصبح همنا الوحيد كيف نقضي عليهم و نقيم عليهم الحد و نهدر دمائهم و كل هذا يتم من قبل رجال الدين الذين يضعون أنفسهم في موضع الإله الذي يدينون به و يتخذوا قرارات على مزاجهم نيابة عنه و كأن مسألة إهدار الدم دى حاجه بسيطة و عادية مع إن أصلا الملحدين لا يؤمنون بإهدار الدم فكيف تنفذ عليهم عقوبة لا يؤمنون بأصولها ولا بالديانات التي تبيحها فمن يكونوا هؤلاء حتى يحكموا على أي شخص بالكفر أو بإهدار الدم فالجميع بشر و لا يميز أحد عن الأخر بصفة الإله و لا يجب أن يسمح لأحد أن يتدخل في علاقة روحيه بين الفرد و ما يؤمن به.
و نجد أيضا النفور و الابتعاد بين أصحاب الديانات السماوية الثلاثة فالمسلم لا يحبذ المسيحي و اليهودي و هم أيضا لا يحبذون المسلم ولا يحبذون بعضهم, فمثلا يوجد من المسلمين من هم يكفرون المسيحيين و اليهود و نجد أيضا المسيحيين في معظم الأحيان يصادقون المسيحيين مثلهم و يبتعدون عن المسلمين و هذا حال بعض المسلمين أيضا فلماذا كل هذا التطرف لديانات لا يجب أن تؤثر في حياتنا من حيث الاتفاق أو الاختلاف مع الآخرين.
و يوجد نفس التعصب بين أصحاب الديانة الواحدة ف في الإسلام السنة لا يحبون الشيعة و يحاربونهم كما هو الحال في العراق و المسيحية فيها عدة مذاهب و كل مذهب ينكر المذهب الآخر.
لماذا كل هذا التعصب و التشدد الأعمى في مسألة الأديان من نحن كي نحكم على الآخرين بالثواب و العقاب,من نحن لنكفر أحد يدين أو لا يدين بمعتقد أو اله؟؟؟؟؟؟؟؟
لماذا لا نعيش جميعا حياه اجتماعيه مترابطة و ليست حياه دينيه مفككه؟؟
لماذا يريدونها المسلمون دوله اسلاميه؟؟
و لماذا يريد المسيحيون الانفصال بصعيد مصر؟؟
لماذا تعامل الناس بعضها على أساس الديانات؟؟
فلكل إنسان الحرية أن يدين بما هو/هي مقتنعين به أو لا يدين بشيء فكلنا أحرار..
لماذا يسمح أن يعاقب أحد لمجرد أنه مارس حقه في اختيار إذا كان يريد أن يدين بشيء أم لا, أو انه مارس حقه في اختيار أسلوب حياته؟؟
إننا لم نستوعب بعد إن كلنا حر في اختيار كيف يريد أن تكون حياته...
فالإنسان لم يولد حتى يكره على شئ لا يريده ولا أن يفرد عليه اتباع الآخرين إن كان مختلف عنهم و لكننا ولدنا كي نختار حياتنا و لا أن نجبر على اتباع حياه لا نريدها .

امه عربيه

يا عرب

يا عرب يا عرب

يا عرب في أي مصر
يا عرب يا عرب

اسمعوا صوت شعب مصر
احفظوا لمصر المكان

و إحنا ع العهد اللي كان
مصر أوفى م الزمان

وانتوا عارفين شعب مصر
يا عرب يا عرب

يا أهل مصر

*****

اللي خانوا العهد بينا

و استباحوا كل حاجة
و استهانوا بالعروبة

و استكانوا للخواجة
مستحيل حيكونوا منّا

إحنا حاجة و هما حاجة

*****
هما باعوا الجلابية

والوطن و البندقية
و ا حنا أصحاب القضية

إحنا ما بنبيعش مصر

*****
يا عرب يا عرب

يا عرب يا أهل مصر

يطلع الدجال بزيفه

يملا وادي النيل ضباب
ينزل الجلاد بسيفه

يزرع الموت و الخراب
يطول الليل زي كيفه

الصباح له ألف باب
و إحنا بوصلتنا ف إيدينا

ما تخافوش من الليل علينا
مهما غبتوا عن عينينا
انتوا جوا ف قلب مصر
يا عرب يا عرب يا أهل مصر
*****
سينا ولا

يافا ولا

حيفا ولا

دير ياسين
اسألوا الشمس اللي هالة

ع اللي صحيوا مبدرين
يزرعوها نور و غلة

دول جدودنا ولا مين ؟
حقنا و حتما ً يُعاد

بس لو بانت سعاد
و البيان ده له معاد
و المعاد حيكون ف مصر
يا عرب يا عرب

يا عرب يا أهل مصر

الشاعر

أحمد فؤاد نجم

***********

كان نفسي أقدر أقول للمقاومة في لبنان و فلسطين و العراق مصر معاكم و هتفضل مأواكم كما كانت دائما فيما مضى و انها ملاذكم و سوف تقف معكم حتى النهاية و النصر ان شاء الله و سوف تكون أول من يهب لنجدتكم و مساعدتكم.... و لكن عفوا فقد تغير الوضع فبعد ان كانت مصر ملاذكم أيها العرب أصبحت الان ملاذ عدوها و عدوكم و هذا بفضل الحكام الخائنين أصبحت مصر ملاذ أمريكا و اسرائيل و أصبحت من تدين المقاومة العربية و بسالة المقاومةأصبحت من ضحى ب العروبة و من مِن قبل ذلك ضحى ب مصريتنا فعندما سمعنا موقف السعودية المعادى للمقاومة فوجئنا و لكن جاء موقف مبارك و صدمنا جميعا و جرح كل عربي ف حسبنا الله و نعم الوكيل في كل حاكم عربي عميل للعدو و أولهم أنت يا مبارك أيوه أنت اللي ضيغت اسم مصر حسبنا الله و نعم الوكيل أنت طبعا مش حاسس بأي حاجه يا مبارك و لا فارق معاك شعب مصر يتبهدل مش همك, يجوع مش همك, يتعذب ف سجونك مش همك, عروبه تضيع مش همك, فلسطين تموت مش همك, و عراق تخرب مش همك, لبنان تولع مش همك, لكن اللي يهمك انك تفضل متحنط ع الكرسي متتحركش ,و تسرق فلوسنا انت و ولادك و تأكلوا و تشربوا و تتهنوا و تتفسحوا و احنا ف ستين داهية

ربنا يريحنا منكم انت يا واللي زيك يا بتوع أمريكا بجد كلنا المصريين بنكرهك و بعد متسيب عرش مصر ان شاء الله محدش هيفتكرك يا عميل و ان افتكرناك هيبقى بكل سوء عشان عمرك معملتلنا حاجه كويسه و حسبنا الله و نعم الوكيل ضيعتنا و بهدلتنا حتى الفرصه اللي كانت ممكن تخلينا نسامحك ضيعتها و نسيت العروبة و وقفت مع الصهاينة و الأمريكان فلقد أصبحت حقا امه عربيه تهوى و تعشق العبودية و ليست أمة عربيه موحدة فقد لوثت أنت وأمثالك الحكام الخائنين عروبتنا ولم تتمكنوا من نسيان زمن العبودية و كان اصراركم أن تظلوا عبيد للعدو ف العبودية تجري بعروقكم مهما امتلكتم من أموالنا و أغتنيتم من جهدنا ستظلون عبيدا للعدو و لن تتغيروا أبدا

ولكن الشعوب العربية سوف تدافع عن نفسها و لن نستعبد مثلكم يا أيها الحكام العبيد و لن نرضى بخيانة مصر و عروبتنا و لن نبيع مصر و العرب , ف حسبنا الله و نعم الوكيل و نحن المصريين على براءة تامة من تصريحك المهين لنا جميعا أيها الرئيس لقد أذللتنا بما فيه الكفايةوكفايه